divider

Tagesbricht vom Schmugglerspiil

Am morgä en Brunch und dänn ufs Gländ chli go kämpfä. Schmugglerhärz was wetsch nu meh! Bevors jedoch mitem eigentlichä Spiil los gangä isch, händ d`Chreisschefä Rüdi, Fürscht und Beauty ihri Teams gwählt und sich uf die erscht Ufgab gstürtzt. Mer hät mösä ä Burg baschtlä, mit allem wo halt gad so im Wald umä liit. I därä Burg inä, isch äs ei deponiert wordä. Mithilf vomänä Stei nach Wahl händ dänn di andärä Gruppä probiert das ei kabutt z`machä. Jedä Chreis zwei Würf, dänn ischs zur nöchschtä Burg gangä. Ahschlüssänd ischs dänn äntli sowit gsi, lets get ready to rumble!

Bald scho hät mer d`eigäheitä vo dä verschidänä chreis chönä gseh. Dä Chreis Rüdi mitärä fascht perfektä Defensive, Chreis Fürscht mit seiltänzerischer Athletik und Chreis Beauty mit Guerilla-Taktik und änärä gsundä Portion Härti.

Dä z`Nacht hät dänn leider wegem starchä Rägä nöd chönä ufem Fäld ignoh werdä. Scho churz nocher hät aber dä Himmel ufklart und dä schlussspurt mit Joker usgab isch igleität wordä. Bis ca. am nüni isch um jedä Bändel und jedä Barrä gfightät wordä. Am Schluss hät dä Chreis Rüdi mit 200 Pünkt (oder für Känner en blauä Barrä) vorsprung gwunnä. Mit äs paar chlinärä blauä Fläggä und frisch geduscht ischs dänn am Zähni ab id Zimmer gangä.

Tagesverantwortlichi Gili und Stifler